Една од најомилените. Совршена во својата едноставност, симфонија на вкусови и ароми и совршен баланс на текстури. Есенска убавица без која за мене, есента не е есен.
Количините за оваа пита се за правоаголен сад за печење со внатрешни димензии од 17х23 цм. За поголема количина, двојно зголемете ги состојките.
Во топла варијанта, совршено се љуби со топка сладолед од ванила, како контраст на топлите зачини кои што ги содржи ова мало мирисно парче рај.
СОСТОЈКИ
За долното тесто
- 125 гр меко пченично брашно
- 50 гр путер
- 2 рамни супени лажици шеќер
- 1/2 лажиче ѓумбир во прав
- 1 полно лажиче прашок за печиво
- 1 супена лажица јогурт
- 1-2 лажици ледено студена вода (по потреба)
За филот во средина
- 4 големи киселкасти јаболка
- 2 супени лажици мед
- 1 лажиче цимет во прав
- сок од 1/2 лимон
- 1 супена лажица гриз
- 1/2 лажиче мелен кардамом/кардамон
- 1/2 лажиче сушена кора од портокал
За горниот, сипкав слој
- 100 гр меко пченично брашно
- 50 гр мелен лешник (мелени бадеми или ореви се исто така во игра)
- 80 гр путер
- 4 рамни супени лажици шеќер
НАЧИН НА ПРИГОТВУВАЊЕ
Најлесниот и најбрзиот начин на подготовка е ако имате мултипрактик. Ништо страшно ако немате, ќе брцкате прстиња во брашно и путер и ќе си правите песок.
Најпрво почнувате со долното тесто. Путерот од фрижидер исецкан на коцки и додаден во сите наведени суви состојки се трие меѓу дланките за да се направи како песок, потоа се додава јогуртот и евентуално водата, само колку да можете песочната текстура да ја претворите во топче тесто. Не месете и не стискајте многу, затоа што тестото ќе ви биде жилаво, а нам ни треба да се топи во устата. Ставете го во пластична фолија и оставете го во фрижидер најмалку 1/2 час. За тоа време подгответе го филот.
Излупете ги јаболката и извадете го средниот дел, каде што се семчињата. Насецкајте ги на четвртинки, а потоа на тенки ливчиња. Посипете ги со сокот од лимон и додадете ги медот и зачините. Промешајте и оставете на страна.
Сега направете го горниот слој. Соединете ги сувите состојки и со помош на студениот путер, направете трошки, триејќи ја смесата помеѓу дланките. Готово!
Време е за редење на слоевите. Сега вклучете ја рерната на 180 С. Извадете го тестото од фрижидер и ставете го помеѓу два листа хартија за печење. Со помош на оклагија, истенчете го до саканата форма на садот во кој што ќе ја печете питата. Доколку на едната страна имате повеќе тесто, слободно исечете го и додадете го таму каде што можеби ќе ви фали. Без проблем се крои и прекројува, бидејќи во текот на печењето секако ќе се формира во една база врз која ќе лежи филот.
Врз ова тесто ставете го филот. Сега е моментот да го додадете гризот, бидејќи во меѓувреме, јаболката пуштија сок и гризот има улога на тампон состојка која што ќе ја впие течноста и нема да дозволи да имате мокар, сланинест слој на дното. Сега, со рацете формирајте грутчиња (стискајте го тестото во дланката) од горниот песоклив слој и покријте го целиот фил.
Питата печете ја на средната решетка во рерната, на 180 С, едно 30 до 40 минути, во зависност од тоа како ви пече рерната. Кога е топла, исклучително тешко се вадат парчиња без да се растурат, па почекајте да биде млака за да може убаво да се исече и да се сервира.
Ве молам, немојте да користите маргарин, питата има многу малку состојки и штета е да се расипе тој прекрасен вкус кој што инаку го дава путерот.
Исто така, јаболката можете да ги замените со џем од сливи, кајсии или да насецкате праски или пак да ја направите со шумско овошје. Во тој случај, изоставете ги кардамомот и циметот, а додајте арома на ванила.
Коментари
Постави коментар