Паштета од туна

Со години не купувам паштети, туку си ги правам сама. Сакам да знам од што се направени и со каков квалитет се состојките од кои што се направени истите. 

Во недостиг на идеи за појадок, денес правев паштета од туна. Има многу варијации на тема паштета од туна; со додаток на кисели краставички, јајца, кисела павлака, мајонез, но јас повеќе го сакам оној чист, буквално "морски" вкус на паштетата. 

Фина, ароматична, со свеж медитерански штих, како да ме повикува на патување по Медитеранот. 

Ја намачкав на тостирано 'ржано лепче со семиња и  додадов сушени маслинки и свежа краставица. 

Бомба од ароми, вкусови и свежина. 

Потребни состојки

• 1 конзерва туна во вода
• 1 мааалечка главица кромид (ставив црвен кромид, има далеку понежна арома од жолтиот) 
• 2 чешниња лук
• 1 полна кафена лажичка закиселени капари
• 1 полна лажичка дижон сенф
• 1 инчун од масло
• 1 супена лажица екстра девствено маслиново масло
• 1 лажичка ворчестер сос
• Сок од 1/4 лимон (+/- по вкус) 
• Мелен зелен бибер
• На врв на лажичка мелен димен црвен пипер
• 60 гр растопен путер (не врел!) 

Начин на поготовка

Туната добро исцедете ја од водата. Во блендер или во сецко ставете ги сите состојки и блендајте до саканата текстура (повеќе рустична или потполно мазна текстура). Паштетата ставете ја во тегличка со капак и оставете ја во фрижидер најмалку еден час, за да се хомогенизираат аромите. 

И толку! 

* Веројатно забележавте дека меѓу состојките нема сол. Едноставно, не е потребно додавање на сол бидејќи инчуните, ворчестер сосот и скиселените капари содржат доволно количество на истата.