Долго време мака мачев со наоѓање на гранола во која нема додадени шеќери, гликозен сируп, вештачки ароми и слично. И покрај огромната понуда во маркетите овде каде што живеам, моите здравствени потреби некако не се поклопуваа со истоимената понуда па решив да си направам сама нешто што ќе биде во согласност со моите потреби, а да не чини мало богатство.
Се прави многу лесно, за околу половина час и за кратко време ќе имате одличен додадок за појадок. Количината на состојките си ја прилагодувате самите.
Од оваа количина добив една голема тегла.
СОСТОЈКИ
- 80 гр ореви
- 50 гр ленено семе во зрно
- 50 гр непечено семе од тиква
- 50 грама непечен сончоглед
- 50 гр непечен лешник
- 80 гр путер од кикирики без додаден шеќер
- 15 гр протеин од ванила
- 2 лажици еритритол (опционо)
- суво овошје (опционо)
НАЧИН НА ПОДГОТОВКА
На плех од рерна ставете хартија за печење и вклучете ја рерната на 170 С. Оревите и лешниците истолчете ги но не многу ситно. Изборот на јатки зависи од желбите и потребите.
Во подлабок сад ставете ги сите состојки и добро промешајте ги со лажица или со рака. Јас ги мешам со рака за да имам осет колку „песоклива„ треба да биде смесата.
Кога сте добиле текстура на песок, смесата префрлете ја во плехот за печење, рамномерно распоредена во потенок слој.
Печете околу 15 до 20 минути со чести проверки. На половина од изминатото време, промешајте ја гранолата за да се испече рамномерно.
Оставете ја да се излади во плехот во кој што се печела и потоа соберете ја во адекватен сад со капак.
Чувајте ја на темно и не многу топло место за да не ужегнат јатките.
Коментари
Постави коментар